1. Vajtswv pom thiab paub txhuayam

Vajtswv tsis yog tus uas tsis paub txog koj txoj kev txomnyem. Nws pom txhua yam kev phem thiab kev mob uas luag ua rau koj, “Tus Tswv pom txhua yam xwmtxheej uas muaj nyob txhua qhov, Nws ntsia ntsoov peb, thaum peb ua zoo lossis ua phem.” (Pajlug 15:3)

2. Vajtswv yog tus Ncajncees – Nws mamli ua tus pauj rau koj. 

Vajtswv cog lus tias nws yuav ua pauj rau cov neeg phem raws li lawv tau ua. Nws tsis hnovqab qhov phem uas lwm tus tau ua rau koj dhau mus, tabsis Nws hais kom peb tso txhuayam rau Nws ua tus txiavtxim thiab pauj kev ntsim siab uas luag ua tsis ncaj rau koj.

“Cov kwvtij, nej tsis txhob ua pauj rau luag, tiamsis cia qhov ntawd rau Vajtswv mamli ua, rauqhov Vajtswv Txojlus haistias, "Kuv yog tus yuav ua pauj thiab Kuv yog tus yuav rautxim, tus Tswv hais li ntawd."
(Loos 12:19)

3. Vajtswv muab lubcaij rau cov neegphem hloovsiab tig rovlos

Txawm lawv ua phem rau koj, Vajtswv tseem xav kom lawv tig rov los txais kev zamtxim. Qhov no qhia txog Vajtswv txoj kev khuvleej loj heev. “Kuv puas xyivfab thaum tus neeg phem tuag lawm? Qhov uas kuv nyiam yog thaum nws tig los ntawm nws txoj kev phem thiab muaj txojsia nyob.” (Exekees 18:23)

4. Vajtswv siv koj qhov kevmob rau ib qho uas zoodua rau koj

Vajtswv qee zaum cia peb raug mob kom peb lub siab loj hlob thiab ntseeg Nws zoo dua. Nws siv tej kev mob los tsim peb kom muaj siab ntev thiab txo hwjchim. “Koj xav ua phem rau kuv, tabsis Vajtswv siv qhov ntawd los coj kev zoo tuaj, uas yog cawm tau neeg coob.” (Chivkeeb 50:20)

5. Vajtswv Kom Peb Yuavtsum Zamtxim – Tabsis cia Vajtswv mamli ua tus Txiavtxim

Zamtxim tsis yog haistias koj yuav hnovqab tej kev ua phem, tabsis yog kom koj tsokevchim rau Vajtswv. Koj tso los ntawm kev npautaws, thiab cia Vajtswv txiavtxim rawsli Nws txoj kevncajncees. "Nej ib tug yuavtsum ua siab zoo rau ib tug, ib tug hlub ib tug, thiab ib tug zamtxim rau ib tug, tibyam li Vajtswv twb zamtxim rau nej nyob rau hauv Khetos (Cawmseej Yexus) lawm." (Efexaus 4:32)